ചെന്നൈ: നീറ്റ് പരീക്ഷയില്‍നിന്ന് തമിഴ്നാടിനെ ഒഴിവാക്കണമെന്നാവശ്യപ്പെട്ട് മുഖ്യമന്ത്രി എം.കെ സ്റ്റാലിൻ പ്രധാനമന്ത്രി നരേന്ദ്ര മോദിക്ക് കത്തയച്ചു.
ദേശീയതലത്തില്‍ നീറ്റ് സംവിധാനം അവസാനിപ്പിക്കണമെന്നും കത്തില്‍ ആവശ്യപ്പെടുന്നുണ്ട്. നീറ്റ് പരീക്ഷയെ എതിർത്തുകൊണ്ട് തമിഴ്നാട് നിയമസഭ പ്രമേയം പാസാക്കിയിരുന്നു. ഇതിന് പിന്നാലെയാണ് പ്രധാനമന്ത്രിക്ക് സ്റ്റാലിൻ കത്തയച്ചത്.
നീറ്റ് പരീക്ഷ ഗ്രാമീണ മേഖലയിലെ വിദ്യാർഥികളുടെ അവസരം ഇല്ലാതാക്കുകയും സ്കൂള്‍ വിദ്യാഭ്യാസം ഉപയോഗശൂന്യമാക്കുകയും മെഡിക്കല്‍ കോളജില്‍ വിദ്യാർഥികളുടെ സീറ്റ് തട്ടിയെടുക്കാൻ കാരണമാകുമെന്നും തമിഴ്നാട് നിയമസഭ പാസാക്കിയ പ്രമേയത്തില്‍ പറയുന്നു.
തമിഴ്നാടിനെ നീറ്റില്‍നിന്ന് ഒഴിവാക്കണമെന്നും മെഡിക്കല്‍ പ്രവേശനം പ്ലസ് ടു മാർക്കിന്റെ അടിസ്ഥാനത്തിലായിരിക്കണമെന്നും ആവശ്യപ്പെട്ടുള്ള പ്രമേയം ഞങ്ങള്‍ നിയമസഭയില്‍ ഐക്യകണ്ഠേന പാസാക്കിയിട്ടുണ്ട്. ഇത് രാഷ്ട്രപതിയുടെ അംഗീകാരത്തിനായി അയക്കുകയും ചെയ്തു. എന്നാല്‍, ഇതുവരെ രാഷ്ട്രപതിയുടെ അംഗീകാരം ലഭിച്ചിട്ടില്ലെന്നും കത്തില്‍ പറയുന്നു.